太天真太傻

媽媽見我小菜苗大食，時常好像吃奶吃不飽，為想今晚有覺好瞓，於是在佢臨瞓前叫爸爸開多3Oz奶來「迷暈」我。

好嘞！3Oz奶好快開完，不過究竟係邊個餵我呢？以下是爸媽二人的對話。

媽媽道：「你想爸爸餵你飲奶定媽媽餵呀？」

見我粒聲唔出，爸爸便說：「不如你想媽媽餵便打個呵欠來表示？若想爸爸餵便笑一下？」

一秒唔夠，我用最鮮明的打呵欠表情來回覆他們，爸爸隨即鬆一口氣，還打趣說：「你唔笑就我有得笑嘞！」

爸爸你實在太天真嘞！比我小菜苗還要天真得很。乜你唔知道我飲完奶你係要掃風咩？況且你掃完我風之後，換尿片也是入你數喎！兼且阿媽還留有一手，在你幫我換尿片時扮到好唔覺意咁用衫角尾來整醒我，最後你咪又要抱返我，磨多一輪才有得瞓...

而在你抱我期間，阿媽佢仲好施施然咁攞咗你部Iphone來玩喎！當然你要明白，她梗係會話陪你一齊捱眼瞓架...幾咁偉大到令你流眼淚呀！